മലയാളത്തിന്റെ പ്രിയനാടനാണ് പൃഥ്വിരാജ്. താരത്തിന്റെ മകള്‍ അല്ലിയുടെ വിശേഷങ്ങള്‍ സമൂഹമാധ്യമങ്ങളില്‍ ശ്രദ്ധേയമാകാറുണ്ട്. മകള്‍ ജനിച്ചു ഒരുപാട് നാള്‍ കഴിഞ്ഞാണ് പൃഥ്വിരാജ് അല്ലിയുടെ ചിത്രങ്ങള്‍ പങ്കുവെച്ചത്. കോവിഡ് കാലം ഒരുപാട് ആഘോഷങ്ങള്‍ മാറ്റിമറിച്ചു. എങ്കിലും ക്രിസ്മസ് ആഘോഷിക്കാനുള്ള തയ്യാറെടുപ്പിലാണ് ഏവരും. ഇപ്പോഴിതാ പൃഥ്വിരാജിന്‍േറയും സുപ്രിയയുടെയും മകള്‍ അലംകൃത എന്ന അല്ലി സാന്റാ ക്ലോസിനു എഴുതിയ കത്താണ് വൈറലാകുന്നത്.
മകള്‍ എഴുതിയ കത്ത് സുപ്രിയ തന്നെയാണ് സോഷ്യല്‍ മീഡിയയില്‍ പങ്കുവച്ചിരിക്കുന്നത്.’പ്രിയപ്പെട്ട സാന്റ. നിങ്ങള്‍ എനിക്ക് ഒരു സമ്മാനം തരുമെന്ന് ഞാന്‍ പ്രതീക്ഷിക്കുന്നു. പ്ലീസ് സാന്റ, ഞാന്‍ അത്ര നല്ല കുട്ടിയല്ലെങ്കിലും നിങ്ങളേയും നിങ്ങളുടെ മാനുകളേയും എനിക്ക് ഇഷ്ടമാണ്. സ്നേഹപൂര്‍വം അല്ലി,’ എന്നാണ് കത്തിന്റെ ഉള്ളടക്കം. സാന്റാ ക്ലോസിനായുള്ള കാത്തിരിപ്പിലാണ് അല്ലി.
‘സന്തോഷകരമായ സീസണാണിത്! ഡിസംബര്‍ ഇങ്ങെത്തി. വര്‍ഷം മുഴുവനും ഒരു ലോക്ക്ഡൌണ്‍ ആയിരുന്നെന്ന് തോന്നുന്നു! അതിനാല്‍, ഈ വര്‍ഷം സാന്റയില്‍ നിന്ന് ഒരു സമ്മാനം ലഭിക്കുമോ എന്ന് എനിക്ക് ഉറപ്പില്ലെന്ന് ഞാന്‍ അല്ലിയോട് പറഞ്ഞപ്പോള്‍, വികൃതിയായ അവള്‍ ഉടനെ പോയി ഇത് എഴുതി തിരികെ വന്നു! സാന്റയും മാനുകളും ഇത് കേള്‍ക്കുമെന്ന് പ്രതീക്ഷിക്കാം,’ എന്ന കുറിപ്പോടെയാണ് സുപ്രിയ കത്ത് പങ്കുവച്ചിരിക്കുന്നത്.
അല്ലിക്ക് നെറ്റ്ഫ്ലിക്സിലെ ക്ലോസ് എന്ന സിനിമ കാണിച്ചു കൊടുക്കൂ എന്ന് ചിത്രത്തിനു താഴെ ഒരാള്‍ കമന്റ് ചെയ്തപ്പോള്‍, തന്റെ മനസില്‍ ഇപ്പോള്‍ കരുതി എന്ന ചിത്രം മാത്രമേ ഉള്ളൂവെന്ന് സുപ്രിയ പ്രതികരിച്ചു.