തടിവെട്ടിയിടും. അത് ചുമന്ന് വണ്ടിയിൽ കയറ്റും. വഴിപോലുമില്ലാത്ത ഇടങ്ങളിലൂടെ വണ്ടി ഓടിച്ച് ലക്ഷ്യസ്ഥാനത്തെത്തിക്കും. ലോഡിങ്ങും അൺലോ‍ഡിങ്ങും ഡ്രൈവിങ്ങും ഒപ്പം ബിരുദപഠനവും അമ്മയെന്ന റോളും. ഇരുപത്തിനാലുകാരിയായ ശരണ്യ ശരിക്കും സൂപ്പറാണ്…നെടുങ്കണ്ടം മൈനർ ഉമ്മാക്കട വാഴത്തോപ്പിൽ ശരണ്യ മുത്തുവിന്റെ അച്ഛൻ മുത്തുപ്പെരുമാൾ പിക്കപ്പ് ഡ്രൈവറാണ്. അച്ഛനെ കണ്ടാണ് ഡ്രൈവിങ് ഹരമായത്. മൂത്ത സഹോദരൻ ശരണും ലോറി ഡ്രൈവറായതോടെ അത് പഠിക്കണമെന്ന് ഉറപ്പിച്ചു. അച്ഛനും സഹോദരനും വലിയ വണ്ടികൾ ഓടിക്കുന്നതും ജോലി ചെയ്യുന്നതും കാണുമ്പോൾ അതിന്റെ ഭാഗമായി തന്നെ ഉണ്ടായിരിക്കണമെന്ന ആഗ്രഹം ശരണ്യയുടെ മനസ്സിൽ വളർന്നു. ആ ആഗ്രഹം വെറുതെയാക്കാതെ, കുടുംബത്തിന്റെ പിന്തുണയും പ്രോത്സാഹനവും തേടിയാണ് അവൾ ഡ്രൈവിങ് പഠിക്കാൻ തീരുമാനിച്ചത്. അച്ഛനും സഹോദരനും ചേർന്ന് ശരണ്യക്ക് ആവശ്യമായ പരിശീലനം നൽകി.
വൈകാതെ തന്നെ അവൾ ആത്മവിശ്വാസത്തോടെ വണ്ടി ഓടിക്കാൻ തുടങ്ങി. പതിനെട്ടാം വയസ്സെത്തുമ്പോഴേക്കും അവൾ ഓട്ടം പഠിച്ച് ലൈസൻസ് സ്വന്തമാക്കിയിരുന്നു. ജീവിതത്തിന് നിറം പകർന്ന് രണ്ട് മക്കളുമെത്തി. ഇതിനിടെ അച്ഛൻ മുത്തുപ്പെരുമാൾ തടി വാങ്ങി മുറിച്ച് വിൽപന നടത്താൻ തുടങ്ങി. തടി മുറിക്കാനും ലോഡിങ്ങിനും അച്ഛനെ സഹായിക്കാനായി പഴയൊരു ഷർട്ടിട്ട് തലയിൽ കെട്ടുംകെട്ടി ശരണ്യ ഇറങ്ങി. പഠനത്തിന്റെ ഇടവേളകളിലായിരുന്നു ജോലി. ജോലിയിടത്തിലും കൂലിയിലും വിവേചനങ്ങളില്ലെന്ന് ശരണ്യ പറയുന്നു.പറമ്പിൽ നിൽക്കുന്ന മരം വെട്ടി താഴെയിട്ട് മുറിച്ച് കഷ്ണങ്ങളാക്കി വാഹനത്തിൽ കയറ്റുന്നത് കായികാധ്വാനമുള്ള ജോലിയാണ്. ജോലി കഴിയുമ്പോൾ വിയർത്ത് കുളിക്കും. ശരീരത്തും വസ്ത്രങ്ങളിലും ചെളി പുരളും. ജോലി കഴിഞ്ഞ് ശരണ്യയും ഭർത്താവും അച്ഛനുംകൂടി ഒരു ഹോട്ടലിൽ കയറി. എന്നാൽ അവിടെ ഭക്ഷണം കഴിക്കാനെത്തിയ ചിലരുടെ വാക്കുകൾ ശരണ്യയെ വേദനിപ്പിച്ചു. ആ പരാമർശങ്ങളിൽ തളർന്നിരിക്കാൻ ശരണ്യ ഒരുക്കമല്ലായിരുന്നു. താൻ ചെയ്യുന്ന ജോലി മോശപ്പെട്ടതല്ലെന്ന് നാട്ടുകാരെ അറിയിക്കണമെന്ന് ആഗ്രഹം തോന്നി. അങ്ങനെയാണ് വീഡിയോ ഇൻസ്റ്റഗ്രാമിൽ പങ്കുവെച്ച് തുടങ്ങിയത്.തടി മുറിക്കുന്നതിന്റെയും ലോഡ് ചെയ്യുന്നതിന്റെയും വീഡിയോകൾ ഇൻസ്റ്റഗ്രാമിലിട്ടു. തടി കയറ്റിയ പിക്കപ്പുമായുള്ള പെരുമ്പാവൂർ യാത്രകൾ ആഘോഷമാക്കി. വീഡിയോകൾ കേറിയങ്ങ് ഹിറ്റായി. അമ്പതിനായിരത്തോളം ഫോളോവേഴ്സും. മക്കളായ നാലര വയസ്സുകാരി സൂര്യഗായത്രിയും രണ്ടര വയസ്സുകാരൻ സൂര്യകൃഷ്ണയും അമ്മക്കൊപ്പം റീലുകളിൽ പ്രത്യക്ഷപ്പെടാറുണ്ട്. തൂക്കുപാലം ജവഹർലാൽ നെഹ്‌റു കോളേജിലെ മൂന്നാംവർഷ ബിബിഎ വിദ്യാർഥിനിയാണ് ശരണ്യയിപ്പോൾ. കഴിഞ്ഞ കുറച്ച് വർഷങ്ങൾ ശരണ്യയുടെ ജീവിതത്തിൽ വലിയ മാറ്റങ്ങൾ നിറച്ച കാലമായിരുന്നു. കുറെ നാളുകൾക്കകം തന്നെ ശരണ്യ വിവാഹിതയായി. അവളുടെ ജീവിതത്തിലേക്ക് വലിയൊരു പിന്തുണയായി ഭർത്താവ് സൂര്യ വന്നുചേർന്നു. സൂര്യയും ഒരു ഡ്രൈവറായിരുന്നു. തന്റെ ഭാര്യയുടെ ആഗ്രഹങ്ങളെ പൂർണമായി മനസ്സിലാക്കുകയും പിന്തുണക്കുകയും ചെയ്തതോടെ ശരണ്യയ്ക്ക് ആത്മവിശ്വാസം കൂടി. വിവാഹത്തിനുശേഷവും അവൾ ബിരുദപഠനം താല്പര്യപൂർവം തുടർന്നു. അതിനിടെ, കുടുംബ ജീവിതത്തിന് നിറം പകർന്ന് രണ്ട് മക്കളും അവളുടെ ജീവിതത്തിലേക്ക് എത്തിയപ്പോൾ അത് അതിയായ സന്തോഷമായി മാറി.
