മഞ്ഞുരുകും കാലം എന്ന സീരിയൽ കേരളത്തിൽ ഉണ്ടാക്കിയ ഓളം ചെറുതല്ല… ആ സീരിയൽ പോലെ തന്നെ സീരിയലിലെ കഥാപാത്രമായ ജാനിക്കുട്ടിയെ അവതരിപ്പിച്ച എല്ലാ പ്രായത്തിലുമുള്ളവരും ഏറെ ശ്രദ്ധിക്കപ്പെട്ടിരുന്നു… വിവാഹം കഴിഞ്ഞ് വർഷങ്ങളേറെ കഴിഞ്ഞിട്ടും കുട്ടികളുണ്ടാകാത്ത തഹസിൽദാറായ വിജയരാഘവൻ്റെയും രത്നമ്മ ടീച്ചറുടെയും മകളായിട്ടാണ് ജാനിക്കുട്ടി എന്ന വിആർ ജാനകിയെ ഇരുവരും ദത്തെടുക്കുന്നത്. വിജയരാഘവന്റെയും രത്നമ്മയുടെയും കണ്ണിലുണ്ണിയായി ഓടിച്ചാടി നടക്കുന്ന ആദ്യത്തെ കുഞ്ഞു ജാനിക്കുട്ടിയായി എത്തിയത് ഇപ്പോൾ മഴ തോരും മുമ്പേ പരമ്പരയിൽ രേവതിക്കുട്ടിയായി എത്തിയിരിക്കുന്ന പെൺകുട്ടിയാണ്. അന്ന് വെറും നാലു വയസായിരുന്നു ആ പെൺകുട്ടിയുടെ പ്രായം.
അന്ന് ജാനിക്കുട്ടിയായി എത്തിയ കെസിയ എസ് തോമസ് എന്ന മിടുക്കിയാണ് ഇപ്പോൾ പത്തു വർഷങ്ങൾക്കിപ്പുറം രേവതിക്കുട്ടിയായി എത്തിയിരിക്കുന്നത്. അതിനിടെ അമ്മുവിന്റെ അമ്മയിലെ അമ്മുവായും കറുത്തമുത്ത് സീരിയലിലെ മുത്തുമോളായും എല്ലാം കെസിയ എത്തിയിരുന്നു. രണ്ടര വയസിൽ അഭിനയിക്കാൻ തുടങ്ങിയ കെസിയയുടെ ആദ്യ സീരിയൽ ഏഷ്യാനെറ്റിലെ സ്ത്രീധനം ആയിരുന്നു. പരമ്പരയിൽ നായികയുടെ ദിവ്യയുടെ മകൻ കണ്ണനായാണ് അഭിനയിച്ചത്. വലുതായപ്പോൾ മഞ്ഞുരുകും കാലത്തിലും കറുത്ത മുത്തിലും എല്ലാമെത്തി. അതിനു ശേഷം സുന്ദരി, ഭാഗ്യലക്ഷ്‌മി, കുറച്ചു കാലം മുമ്പ് സൂര്യാ ടിവിയിൽ സംപ്രേക്ഷണം ചെയ്‌തിരുന്ന കനൽപ്പൂവ് എന്ന സീരിയലിലും എല്ലാം കെസിയ എത്തിയിരുന്നെങ്കിലും അതത്ര ശ്രദ്ധ നേടിയിരുന്നില്ല. എന്നാൽ മഴ തോരും മുമ്പേയിലെ രേവതിക്കുട്ടിയെന്ന കഥാപാത്രം ഏറെ ശ്രദ്ധ നേടിക്കഴിഞ്ഞു. വെറും 14 വയസുകാരിയായ കെസിയ ഇരുപതോളം സീരിയലുകളിൽ ഇപ്പോൾ തന്നെ അഭിനയിച്ചു കഴിഞ്ഞു.
തിരുവനന്തപുരം ശംഖുമുഖം സ്വദേശിനിയായ കെസിയയുടെ കുടുംബം അച്ഛനും അമ്മയും അടങ്ങുന്നതാണ്. മഞ്ഞുരുകും കാലത്തിൽ അഞ്ചോളം കുട്ടികളാണ് ജാനിക്കുട്ടിയുടെ വ്യത്യസ്ത പ്രായത്തിലുള്ള കുട്ടികളായി എത്തിയത്. അതിൽ ആദ്യമെത്തിയതായിരുന്നു കെസിയ എസ് തോമസ്. അതുകഴിഞ്ഞാണ് നിരഞ്ജന എന്ന കുട്ടി എത്തിയത്. നിരഞ്ജനയുടെ വരവ് പരമ്പരയെ കൂടുതൽ ശ്രദ്ധേയമാക്കിയിരുന്നു. അതിനു ശേഷമാണ് ഗ്രീഷ്‌‌മ എന്ന കുട്ടി എത്തിയതും അതിനും ശേഷം നിഖിത എത്തിയതും. ഇപ്പോൾ മഴ തോരും മുമ്പേയിലും നിഖിതയാണ് നായിക. നിഖിതയുടെ അനിയത്തിയുടെ വേഷത്തിലാണ് കെസിയ എത്തുന്നെങ്കിലും നായികാ കഥാപാത്രത്തോളം തന്നെ ശ്രദ്ധ നേടുന്നുണ്ട് രേവതിക്കുട്ടിയെന്ന കെസിയയുടെ കഥാപാത്രം. ഇപ്പോൾ ഒൻപതാം ക്ലാസുകാരിയായ കെസിയ പഠനത്തിരക്കുകൾക്കിടയിലാണ് സീരിയൽ അഭിനയവും തുടരുന്നത്.രേവതിക്കുട്ടിയെ ചേർത്തുപിടിക്കുന്ന മാമച്ചായൻ ഗ്രേസമ്മ കഥാപാത്രങ്ങൾക്കും നിരവധി പ്രശംസകളാണ് ലഭിക്കുന്നത്. ഏഷ്യാനെറ്റിൽ ആഴ്‌ചകൾക്കു മുമ്പ് മാത്രം സംപ്രേക്ഷണം ആരംഭിച്ച പരമ്പരയാണ് മഴ തോരും മുമ്പേ. ഇതിനോടകം തന്നെ റേറ്റിംഗിലും നാലാം സ്ഥാനത്തേക്ക് എത്തുവാൻ പരമ്പരയ്ക്ക് സാധിച്ചിട്ടുമുണ്ട്. അച്ചായൻസ് എന്ന സിനിമയിലും കെസിയ അഭിനയിച്ചിട്ടുണ്ട്.
