ഒരു കാലത്ത് മലയാള മിനിസ്ക്രീൻ ലോകത്തെ സമ്പന്നമാക്കിയത് നിരവധി മികച്ച സീരിയലുകളാണ്. ആ പരമ്പരകളുടെ പേര് ഇന്നും മലയാളി മനസുകൾ മറന്നിട്ടില്ല. അക്കൂട്ടത്തിലുള്ളതാണ് ദേവീമാഹാത്മ്യവും ഓമനത്തിങ്കൾ പക്ഷിയും വേളാങ്കണ്ണി മാതാവും അമ്മ സീരിയലുമെല്ലാം. സിനിമാ താരങ്ങളേക്കാൾ പ്രേക്ഷകരുടെ മനസു കീഴടക്കാൻ ഈ സീരിയൽ താരങ്ങൾക്ക് കഴിഞ്ഞിരുന്നുവെന്നതാണ് സത്യം. ഇപ്പോഴിതാ, അക്കൂട്ടത്തിലൊരു ബാലതാരത്തിൻ്റെ വിശേഷങ്ങളും ചിത്രങ്ങളുമാണ് പ്രേക്ഷകർക്ക് മുന്നിലേക്ക് എത്തിയിരിക്കുന്നത്. അന്നത്തെ കുട്ടിത്താരങ്ങളിൽ ചിലർ ഇന്നും സീരിയലുകളിൽ സജീവമാണെങ്കിലും പഠനത്തിലും ആ മേഖലകളിൽ കരിയർ ഉണ്ടാക്കുന്നതിലും ശ്രദ്ധിച്ച ചിലരുമുണ്ട്.അക്കൂട്ടത്തിലൊരാളാണ് ദേവി മാഹാത്മ്യം എന്ന സീരിയലിലെ പഞ്ചമി.
2009ലാണ് ഈ സീരിയൽ സംപ്രേക്ഷണം ചെയ്‌തത്. അന്ന് പഞ്ചമി എന്ന പാവപ്പെട്ട വീട്ടിലെ പെൺകുട്ടി. സത്യസന്ധയും നിഷ്‌കളങ്കയും ദേവിയുടെ അതീവ ഭക്തയുമായ പെൺകുട്ടിയായി പ്രേക്ഷക മനസുകളിൽ ഇടം നേടിയ സുന്ദരിക്കുട്ടി. ആ പഞ്ചമി ഇന്ന് ഒരു ഡോക്‌ടറാണെന്നു പറഞ്ഞാൽ വിശ്വസിക്കാൻ സാധിക്കില്ല. എന്നാൽ സത്യം അതാണ്. അഞ്ചു വർഷത്തെ മെഡിക്കൽ പഠനം കഴിഞ്ഞ് ദന്തഡോക്‌ടറായി മാറിയിരിക്കുന്ന പഞ്ചമിയുടെ യഥാർത്ഥ പേര് സാന്ദ്ര എന്നാണ്. മാത്രമല്ല, ഒരു സൂപ്പർ നർത്തകിയും കൂടിയാണ് സാന്ദ്ര.
ദേവി മാഹാത്മ്യം എന്ന സീരിയലിലെ പഞ്ചമി എന്ന കഥാപാത്രത്തിലൂടെ പ്രേക്ഷകഹൃദയങ്ങളിൽ സ്ഥാനം നേടിയ ഈ പെൺകുട്ടി മറ്റനേകം സീരിയലുകളിലും അഭിനയിച്ചിട്ടുണ്ട്. ജോയ്‌സിയുടെ ഓമനത്തിങ്കൾ പക്ഷി എന്ന നടി ലെന നായികയായി അഭിനയിച്ച പരമ്പരയിൽ കണ്ണു കാണാത്ത കുട്ടിയായാണ് സാന്ദ്ര എത്തിയത്. കൂടാതെ, വേളാങ്കണ്ണി മാതാവ്, സ്വാമിയേ ശരണമയ്യപ്പാ, കെ.കെ രാജീവിൻ്റെ മഴയറിയാതെ, അമ്മ സീരിയൽ തുടങ്ങി ഒട്ടേറെ പരമ്പരകളിൽ അഭിനയിച്ച ഈ മിടുക്കി പെൺകുട്ടി അന്ന് വളരെയധികം സീരിയലുകളിൽ സജീവമായിരുന്നു.
എന്നാൽ അൽപം മുതിർന്നപ്പോഴാണ് പഠനത്തിലേക്ക് ശ്രദ്ധ കേന്ദ്രീകരിക്കാം എന്ന തീരുമാനം വീട്ടുകാരിൽ നിന്നും ഉണ്ടായത്. അങ്ങനെ പതുക്കെ പഠന ലോകത്തേക്ക് തിരിഞ്ഞ സാന്ദ്ര നൃത്ത പഠനം തുടർന്നിരുന്നു. അങ്ങനെ ഇടയ്ക്ക് മഞ്ച് ഡാൻസ് റിയാലിറ്റി ഷോയിലും സാന്ദ്ര പങ്കെടുത്തിരുന്നു. ഇന്ന് മിനിസ്ക്രീനിൽ നിറഞ്ഞു നിൽക്കുന്ന പല താരങ്ങളും സാന്ദ്രയുടെ സുഹൃത്തുക്കളായതും ആ ഷോ വഴിയാണ്. ഇപ്പോൾ മറ്റൊരു വിശേഷം കൂടിയുണ്ട്. ഏഷ്യാനെറ്റിലൂടെ ബാലതാരമായി ജനഹൃദയങ്ങളിലേക്ക് എത്തിയ ഈ താരം ഇപ്പോൾ മലയാള സിനിമയിലൂടെ തിരിച്ചു വരികയാണ്. ഒരു നർത്തകിയും പഠിച്ചു നേടിയ ഡോക്‌ടർ ബിരുദവും എല്ലാം കയ്യിലുണ്ടെങ്കിലും തൻ്റെ കഴിവ് മലയാള സിനിമയിലൂടെയും ടെലിവിഷൻ പരമ്പരകളിലൂടെയും തിരിച്ചുകൊണ്ടുവരാനാണ് സാന്ദ്ര ആഗ്രഹിക്കുന്നത്. കരുനാഗപ്പള്ളി നാടകശാല നിർമ്മിക്കുന്ന രണ്ടാമത്തെ സിനിമയായ സിറ്റി ട്രാഫികിലൂടെ നായികയായി അരങ്ങേറ്റം കുറിക്കാൻ ഒരുങ്ങുകയാണ് സാന്ദ്ര.
